話先說在頭（我可是～很～強～的），以前一直想寫自己，始終我有嚴重自戀，而且寫自己是最有（興）趣的。原本打算通過我跟阿貓的多年相處交錯寫出來，但一直未的的起心肝。結果竟然因為《金魚妻》而想要寫一下自己對長谷川京子的迷戀，結果想到可以順理成章寫自己。我一直話希望自己不要太長命，對於即將踏入35歲，說是已經半世人應該無懸念，所以可以開始滿足自己。
關於長谷川京子.......
1. 誠如世界上大多老套的故事，像「陪朋友去試鏡但係唔小心做咗女主角」，我愛上長谷川京子（以下簡稱「老長」）都係出於偶然。
2. 當年信和除了咸碟，老翻日劇同動漫VCD／DVD都係大戶。其中唔記得1樓上2樓定2樓上3樓扶手電梯隔離，有一間主力賣日劇。作為一間有heart嘅老翻舖，店員在舖頭背面貼滿了不同日劇的封面照做宣傳，務求每個扶手電梯用家都一家知道有咩日劇賣。
3. 時間係2003年到2004年之間，結果我就係行信和上電梯嘅時候畀《屬於我的女神》嘅宣傳圖吸引幾次。當時第一個感覺喺：條女好似加藤美佳
4. 加藤美佳係邊位？《幪面超人555》其中一個女主角是也。唔識《幪面超人555》？世界大戰抹黑宇宙了 Can You Feel?
5. 當年555我真係J到出血，不論係男角女角都非常鍾意，而其中最最最鍾意，就係演怪獸線女主角長田結花嘅加藤美佳。
6. 而就好似以上所講，我會留意老長，純粹因為覺得佢似加藤美佳。今日再睇同一張相，發現其實一啲都唔似。原來我中學時代已經係盲嘅！
7. 結果一段日子之後，我終於忍唔住豪花80蚊買咗《屬於我的女神》返屋企睇。By the way，同劇男主角係今日貴為尊尼事務所副總裁嘅瀧澤秀明。
8. 結果一睇就沉船。點解可以有女仔咁靚，同時又可愛，仲要著啲衫咁好睇！著衫好睇加100分！著衫好睇加100分！著衫好睇加100分！
9. 個故仔其實好無聊（但唔係太老土），就係講神神化化嘅無業遊民長谷川京子無啦啦有日爬咗入大學生瀧澤秀明新搬入伙嘅單人學生公寓，然後就開始將對方變成自己隻兵嘅故事。
10. 劇入面長谷川京子嘅性格都係神神化化，諗到咩就做咩果啲老套嘢。而睇好靚女又so called有氣質（我知自古以來呢個term都好cheap）嘅佢撚狗咁撚瀧澤秀明真係睇到我好興奮。
11. 今日回首我懷疑到底因為自己本身就已經鍾意閪女人所以鍾意老長，定係因為睇完老長先開始鍾閪女人？Well，這是條懷疑上帝的問題。
12. 沉船之後，開始瘋狂搵所有佢有份演嘅日劇，買寫真亦係基本盤，癲起嚟當時時裝雜誌只要封面有佢個名都會買。話說成堆書仲係娘家封緊塵（但有包好），希望有日可以重見天日。
13. 當然佢啊姐嘅日劇其實大部份都唔係太好評，部份收視/話題性比較高嘅作品通常都主要做花樽。例：華麗一族、東大特訓班（係，就係當日班學生而家上晒神檯果套）
14. 其餘有部份日劇作品係比較冷門，基本上你聽到個名都唔會特別想睇，當中又唔少都係走中女／邪牌路線，個feel同《金魚妻》入面個角色有啲似果種。老老實實好多我都係睇一集半集就頂唔順放棄。
15. 雖然我理解因為年紀大再加佢個樣係似乎幾啱做上述果種戲路，但佢係我心目中永遠都係二十幾歲嘅片岡琉美。而每次我睇佢嘅愛情小品仲會心跳加速。
16. 個人心水仲有一套SP叫做《那年夏天，突然愛上》（個譯名好似咁上下，日文原名叫夏の終わりに、恋をした）。套戲2014年播，基本上果時佢已經唔係十八廿二，仲要仔都生埋，但做返任性閪女人演出都仲有當年影子，而我仍然係J出血。
17. 我好記得呢一套download咗之後一直唔捨得睇（我嘅愈鍾意愈唔睇病有機會再講），係有一晚突然失戀feel然後凌晨4點鐘起身睇完。一邊睇一邊感動幾乎仲有少少眼濕濕。
18. 話說佢近年個樣的確有膠化，大概都係唔知整容定打針之類嘅原因。雖然現時個樣唔再係我杯茶，但情意結似乎真係夠J一世，佢出寫真我仍然係會買、佢有劇我都係會（嘗試）睇、佢開內衣品牌我都係會follow，然後再打個J以表支持。
19. 話說佢上年離婚，我覺得好好。我覺得要離過婚人生先完全。又或者，講法應該係，一個人應該要展現出可以離婚嘅勇氣，或者叫決心/行動力先夠吸引。
20. 似乎對於佢，我唯一不滿係佢選擇生仔。
21. 又似乎純以外表計，佢會係我最欣賞嘅公眾人物。
